കോഴിക്കോട്: കോവിഡ്കാല ഇളവില്‍ ജയിലില്‍നിന്നിറങ്ങിയ കുറ്റവാളിയുടെ ആക്രമണത്തില്‍ മൂന്നു പേര്‍ക്ക് പരിക്ക്. മൂഴിക്കല്‍ ചെരിച്ചില്‍ മീത്തല്‍ അക്ഷയ്യുടെ ആക്രമണത്തിലാണ് അയല്‍വാസിയായ ചെരിച്ചില്‍ മീത്തല്‍ മൂസക്കോയ, ഭാര്യ ആമിന, മരുമകള്‍ റുസ്ന എന്നിവര്‍ക്ക് പരിക്കേറ്റത്. ഇവരെ ഗവ. ബീച്ച്‌ ജനറല്‍ ആശുപത്രിയില്‍ പ്രവേശിപ്പിച്ചു. അക്ഷയ്ക്കും മാതാവ് അംബികക്കുമെതിരെ ചേവായൂര്‍ പൊലീസില്‍ മൊഴി നല്‍കിയിട്ടുണ്ട്. കഴിഞ്ഞ അഞ്ചു വര്‍ഷമായി ഈ കുടുംബത്തിനെതിരെ ആക്രമണം പതിവാണെന്ന് പരിക്കേറ്റവര്‍ പറഞ്ഞു. ലഹരിക്ക് അടിമയായ അക്ഷയ് റെയില്‍വേ ഗേറ്റ്കീപ്പറെ അടിച്ചുപരിക്കേല്‍പിച്ചതിലടക്കമുള്ള കേസുകളില്‍ പ്രതിയാണ്. കോവിഡ് ഇളവില്‍ ജയിലില്‍നിന്ന് ഇറങ്ങിയതാണ്.
