ന്യൂഡല്‍ഹി: രണ്ടുപേരുടെ വികസനത്തിനായി കേന്ദ്രസര്‍ക്കാര്‍ പൊതുജനങ്ങളെ കൊള്ളയടിക്കുകയാണെന്ന് കോണ്‍ഗ്രസ് നേതാവ് രാഹുല്‍ ഗാന്ധി. ഗാര്‍ഹിക പാചക വാതക വില 50 രൂപ ഉയര്‍ത്തിയതിനെതിരെ പ്രതികരിക്കുകയായിരുന്നു അദ്ദേഹം.പാചക വാതക വില വര്‍ധിപ്പിച്ച വാര്‍ത്ത പങ്കുവെച്ചുകൊണ്ടായിരുന്നു രാഹുലിന്‍റെ ട്വീറ്റ്. പ്രധാനമന്ത്രി നരേന്ദ്രമോദിയുടെ സബ്കാ സാത്ത്, സബ്കാ വികാസ് മുദ്രാവാക്യത്തെ ട്രോളിയായിരുന്നു രാഹുല്‍ ഗാന്ധിയുടെ ട്വീറ്റ്.പ്രധാനമന്ത്രി നരേന്ദ്രമോദിക്കും കേന്ദ്ര ആഭ്യന്തര മന്ത്രി അമിത് ഷാക്കും പുറമെ കോര്‍പറേറ്റ് ഭീമന്‍മാരായ അനില്‍ അംബാനിയുടെയും ഗൗതം അദാനിയുടെയും പേരെടുത്ത് പറയാതെയായിരുന്നു വിമര്‍ശനം. മോദി -അമിത് ഷാ, അംബാനി -അദാനി കൂട്ടുകെട്ടിനെതിരെ നേരത്തെയും രാഹുല്‍ വിമര്‍ശനമുന്നയിച്ചിരുന്നു.
