കോഴിക്കോട്:കെ-റെയില്‍ പദ്ധതി കേരളത്തിനും ജനങ്ങള്‍ക്കും അപത്താണെന്ന് ഹനുമാന്‍ സേന ഭാരതിന്‍റെ സംസ്ഥാന സമ്മേളനത്തിന്‍റെ ഭാഗമായി ചേര്‍ന്ന പ്രവര്‍ത്തക യോഗം വിലയിരുത്തി. സർവേ നടത്താനും കല്ലിടാനും ഒരു കാരണവശാലും അനുവദിക്കില്ല. ഇതിനെതിരേ എല്ലാ പഞ്ചായത്തുകളിലും സമര പ്രക്ഷോഭ കണ്‍വന്‍ഷന്‍ വിളിച്ചുചേര്‍ക്കാനും സംസ്ഥാന കൗണ്‍സില്‍യോഗം തീരുമാനിച്ചു.
ഇന്ന് സമ്മേളനം തുടങ്ങും. നാളെ രാവിലെ സംവിധായകന്‍ രാമസിംഹന്‍ ( അലി അക്ബര്‍ ) ഗാന്ധി ഗൃഹത്തില്‍ സമ്മേളനം ഉദ്ഘാടനം ചെയ്യും. സമ്മേളനത്തിന്‍റെ ഭാഗമായി വിവിധ മേഖലകളില്‍ പ്രവര്‍ത്തിക്കുന്ന വാവാ സുരേഷ് അടക്കമുള്ള നാപ്പതോളം പ്രവര്‍ത്തകരെ ആദരി ക്കും. അമൃതാനന്ദമഠത്തിലെ വിവേകാമൃത പുരി സ്വാമികള്‍ ഭദ്രദീപം തെളിയിക്കും. ഹനുമാന്‍ സേന സംസ്ഥാന ചെയര്‍മാന്‍ എം.എം.ഭക്തവല്‍സലന്‍ ചടങ്ങില്‍ അധ്യക്ഷതവഹിക്കും. കേരളം, തമിഴ്‌നാട്, കര്‍ണാടക, ആന്ധ്ര പ്രദേശ് എന്നീ സംസ്ഥാനങ്ങളിലെ സന്യാസിവര്യന്‍മാര്‍, പ്രവര്‍ത്തകര്‍ എന്നിവര്‍ പങ്കെടുക്കും.
കേന്ദ്രകാര്യാലയത്തില്‍ ചേര്‍ന്ന യോഗത്തില്‍ എം.എം.ഭക്തവല്‍സലന്‍ അധ്യക്ഷതവഹിച്ചു. സംഗീത് ചേവായൂര്‍, രാമദാസ് വേങ്ങേരി, സനൂപ് പന്തീരാങ്കാവ്, പി.പുരുഷു മാസ്റ്റര്‍, കവിരാജ് എന്നിവര്‍ പ്രസംഗിച്ചു. സമ്മേളനം നാളെ സമാപിക്കും.
