ഡാലസ്: ആൺ സുഹൃത്തുക്കളോട് അടുത്തിടപ്പഴകിയതിന്റെ പേരിൽ പെണ്മക്കളെ കൊലപ്പെടുത്തിയ കേസിൽ വിചാരണ ആരംഭിച്ച് കോടതി. ഡാലസ് കൗണ്ടി കോടതിയിലാണ് വിചാരണ ആരംഭിച്ചത്. രണ്ട് മക്കളെയും കൊലപ്പെടുത്തിയ ശേഷം രക്ഷപെട്ട പിതാവിനെ 2020ലാണ് പൊലീസ് പിടികൂടിയത്. ഈജിപ്റ്റിൽ ജനിച്ച യാസർ അബ്ദെൽ ആണ് കൊടുംക്രൂരത നടത്തിയത്.
2008 ജനുവരി 1 നാണ് കേസിനാസ്പദമായ സംഭവം. പിതാവ് രണ്ടു മക്കളെയും കാറിൽ വച്ചു കൊലപ്പെടുത്തുകയായിരുന്നു. പ്രതിക്കുവേണ്ടി പൊലീസും എഫ്ബിഐയും 12 വർഷം നടത്തിയ തിരച്ചിലിനൊടുവിലാണ് പിടിയിലായത്. പെൺകുട്ടികൾ ആൺ സുഹൃത്തുക്കളുമായി അടുത്തിടപഴകിയതാണ് പിതാവ് യാസറിനെ പ്രകോപിപ്പിച്ചത്. അമേരിക്കയിൽ എത്തി ഡാലസിൽ ടാക്സി ഡ്രൈവറായി ജോലി ചെയ്തുവരുന്നതിനിടയിലാണ് യാസിർ കൊല നടത്തിയത്. ഡാലസ് ലൂയിസ് വില്ല ഹൈസ്ക്കൂൾ വിദ്യാർഥികളായിരുന്നു കൊല്ലപ്പെട്ട സാറ യാസറും (17), അമിനാ യാസറും (18).
കുടുംബത്തിന്റെ മാനം രക്ഷിക്കാനാണ് കൊലപാതകം നടത്തിയതെന്ന് പ്രതി സമ്മതിച്ചുവെങ്കിലും, കോടതിയിൽ കുറ്റം നിഷേധിച്ചു. ഇർവിങ്ങിലുള്ള ഒരു ഹോട്ടലിനു മുന്നിൽ പാർക്കു ചെയ്തിരുന്ന കാറിലാണ് വെടിയേറ്റ ഇരുവരുടെയും മൃതദേഹം കണ്ടത്.
