കോഴിക്കോട്: വടകര മണ്ഡലത്തിൽ തിരഞ്ഞെടുപ്പ് ഫലപ്രഖ്യാപന ദിവസം വിജയാഘോഷങ്ങൾക്ക് നിയന്ത്രണം. ആഹ്ളാദ പ്രകടനം രാത്രി ഏഴ് മണിവരെ മാത്രമായി പരിമിതപ്പെടുത്തി. ഇന്ന് ചേർന്ന സർവകക്ഷി യോഗത്തിലാണ് തീരുമാനം. വാഹനജാഥയ്‌ക്കും നിയന്ത്രണം ഏർപ്പെടുത്തിയിട്ടുണ്ട്.
ദേശീയതലത്തിൽ വിജയിക്കുന്ന മുന്നണിയുടെ പ്രവർത്തകർക്ക് അടുത്ത ദിവസം ആഹ്ളാദ പ്രകടനം നടത്താമെന്നും യോഗത്തിൽ തീരുമാനമായി. കണ്ണൂർ റേഞ്ച് ഡിഐജി തോംസൺ ജോസിന്റെ നേതൃത്വത്തിൽ നടന്ന യോഗത്തിൽ വിവിധ രാഷ്‌ട്രീയ പാർട്ടി പ്രതിനിധികൾ പങ്കെടുത്തു.
വർഗീയ പോസ്‌റ്റ് പ്രചരിപ്പിച്ച പ്രതികളെ ഉടൻ പിടികൂടുമെന്ന് ഡിഐജി ഉറപ്പ് നൽകി. വോട്ടെടുപ്പിന് ശേഷവും വടകരയിൽ മുന്നണികൾ ഏറ്റുമുട്ടുന്നത് തുടർന്നതോടെയാണ് ഫലം വരുന്നതിന് മുന്നോടിയായി പോലീസ് സർവകക്ഷിയോഗം വിളിച്ചു ചേർത്തത്.
